Hirutik hiru. Hiru Larretxeatarrak igandean, martxoak 1, Azpeitian jokatuko den Binakako Urrezko Aizkolarien txapelketako finalean izanen dira. Maila nagusian Donato Larretxea arituko da, Aitzol Atutxa bizkaitarra lagun duela. Eta gaztetxoen mailan, Garikoitz eta Oihan lehengusuek jokatuko dute, bi leitzarren kontra: Olano eta Saralegiren aurka, hain zuzen.
Donatok eta Atutxak otsailaren 10ean lortu zuten finalerako txartela. Getxon jokatu zen Binakako Urrezko Aizkolarien txapelketako lehen finalerdia irabazteko faboritoak ziren, eta beraiek lortu zuten finalerako txartela, nahiz eta lan aunitz egin behar izan zuten Nazabal eta Mugertza II.a mendean hartzeko. Egin beharreko sei probetatik lautan garaitu zituzten etxarriarra eta mutrikuarra. Proba guztiak egiteko, 24 minutu eta 18 segundo behar izan zituzten Larretxeak eta Atutxa II.ak. 25 minutu eta bost segundo, berriz, Mugertza II.ak eta Nazabalek.
Igandean Azpeitian jokatuko den finalean aurrez aurre Arrospide eta Aierbe izanen dituzte. Guztira sei proba eginen dituzte.
Gazteen mailan ere lehia bizia espero da. Oihan eta Garikoitz Larretxea lehengusuek, beratarrak eta arraioztarrak, Arkaitz Olano leitzarra eta Ruben Saralegi iruñearra (aita leitzarra) izanen dituzte aurrez aurre. Bortz proba egin beharko dituzte.