Hilabetetako lanaren ondotik, azken urteetan bezala, azokak eginen dira Goizuetan Sara larunbat honetan. Goizuetan, azaroko azken larunbatean egin ohi da, eta aurtengoa laugarren edizioa izanen da. Goiz-goizetik hasita ekitaldi andana prestatu dituzte.
Goizeko 10etatik aurrera, artisau postuak eta nekazal produktuak izanen dira ikusgai. Gainera, artisautza ezberdinak egiten ikusten aukera izanen da: joareak, uztaiak, gantxilua, sagardoa, taloak… Herriko jubilatuak, berriz, Labaderoan arropak garbitzeko ariko dira. Herriko karrikak alaitzeaz herriko trikitilariak arduratuko dira.
Eguerdi partean, 14:30ean herri bazkaria eginen da goiko frontoian, eta bazkaldu ondoren Larraña semea eta bere lagunak arituko dira.
Egitarau zabala, egun on bat pasatzeko.
Saran, Eguberrietako merkatua
Bertzelako azoka eginen da Saran, hau ere larunbatean, azaroak 24. Serroren eskolako gurasoek eguberrietako merkatua antolatu dute, eta hala, 9:00etatik 18:00etara bitarte, aita eta amek egindako eskulanak salduko dira, bitxiak, apaingarriak eta berinan egindako margoak, bertzeak bertze.
Pere Noel delakoa ere hor egonen da, eta nahi izanez gero, haurrek potreta baten ateratzeko aukera izanen dute, Arantxa Leizagoien argazkilaria egun guztian plazan izanen baita.