Kasik bikoiztu eginen da Landagain Eskola datozen asteetan. Aspaldiko eskaera eta beharrei erantzunez, eraikinaren handitze-lanak hasiko ditu Iruñerriko Lozano Espinosa konstruktoreak. Nafarroako Gobernuaren eta Udalaren artean ordainduko diren lanak 369.000 euro kostako dira eta datorren uztailerako akabatuko dituzte. Eskuineko aldetik handituko da eraikina, “L” forma osatuz, gibeleko futbol zelaira arte. 164 metro koadroko bi solairu eginen dira. Honen arrazoia leku eskasia da. 52 ikasle eta 7 irakasle daude orain eta badira urte batzuk guztiak kabitzen ez direla. Datorren ikasturtean arazo hauek gainditzea espero da.