Uda hasieran sinatu zuten Arabako Tubos Reunidos eta Condesa enpresak bateratzeko akordioa, eta horren bidez, altzairuzko hodiak egiten dituen Europako bigarren multinazionala sortuko dute. Iragarri zutenez, talde berriak aurten 1.625 milioi euroko salmentak izanen ditu, 4.200 langile, 18 lantegi, eta 145 milioi euroko etekin garbiak espero dituztela ere aipatu zuten. Hain zuzen, 4.200 langile horien artean daude Zalaingo tubo lantegiko 330 langileak ere. Akordio berriak lantegian zein neurritan eraginen duen ez badakite ere, lan hitzarmena negoziatzeko garaian harrapatu dituela gogoratu zuen akordioa sinatu eta biharamunean Fermin Altzugaraik, Zalaingo langile batzordeko lehendakariak. 2006az geroztik negoziatzen ari dira bi aldeak, baina oraindik ez dute adostasunik lortu. Gaineratu zuenez, «2000tik 2007ra bitartean 200.000 tonatik 70.000era jautsi da Arcelorren produkzioa».
Hemendik aitzinera, enpresak Tubos Reunidos izena hartuko du, eta trukean Condesak talde berriko akzioen %36,25 bere eskuetan izanen du, baita kopuru hori %40,1era haunditzeko eskubidea ere. Gisa berean, Condesak Tubacexen zuen zatia, %18 inguru, eratu berri den multinazionalaren esku geldituko da.