Landagain Eskolako haurrek egun handia izan zuten joan den ekainaren 17an. Urtero bezala, Haurren Eguna egin zuten hainbat ekitaldi eta emankizunekin.
Eskulan erakusketa eta ipuin topaketa
Goizean goizetik eskulan erakusketa paratu zuten frontoian. Hainbat herritar harat-honatean ibili ziren haurrek egindako marrazki, panpin, koadro edota eskaiolazko irudiak ikusten. Haurrek eskolan idatzitako ipuinak paneletan paratu zituzten jendeak irakurtzeko eta 12:00etan haur batzuk jendaurrean irakurri zituzten euren kontakizunak. Aspaldiko ohitura da Ipuin Topaketa hau eta Joxe Mari Remiro zuzendariaren erranetan «ikasleak literaturara hurbiltzeko egitasmoa da, ongi pasatzen dute istorioak asmatzen eta herritarren aitzinean irakurtzen». Lehen ipuin lehiaketa egiten zen, baina azken urteetan ez dituzte haurren ipuinak saritzen, «konpetibitatea hausteko eta guztiek merezimendu bera dutela ikusteko» adierazi digu Remirok. Ikasle guztiek ipuin bat jaso zuten oroigarri moduan irakasleen eskutik.
Herri bazkaria eta Euskaraokea
Frontoian bazkaldu zuten Landagaineko ikasleek hainbat lagun eta familiakoekin batera, eta arratsaldean kantari aritu ziren Euskaraokea ikuskizunarekin. Giro eta umore ederrean pasatu zuten herriko ttikienek arratsaldea.