Bigarren urtez segidan Alazne Untxalok irabazi du Nafarroako 14 eta 18 urte bitartekoen Eskolarteko Bertso Txapelketa. Txapeldunordea ere iturendarra izan da, Iker Gorosterrazu.
Larunbat eguerdian eskualdeko bertsozale andana polita hurbildu zen Lesakako Matxinbeltzenera Nafarroako etorkizuneko bertsolarien entzuteko. Finalerako 10 bertsolari sailkatu ziren, Alazne Untxalo, Maite Mendibil, Garazi Taberna, Maialen Belarra, Ioar Tainta, Saioa Alkaiza, Egoitz eta Iker Gorosterrazu, Patxi Kastillo eta Unai Artieda. Lau bertso kantatu ondotik epaimahaiak lehen hautaketa bat egin zuen, eta azken txanparako 6 bertsolari baizik ez ziren sailkatu, Alazne Untxalo, Garazi Taberna, Maialen Belarra, Ioar Tainta, Saioa Alkaiza, eta Iker Gorosterrazu. Bertze bertso batzuk kantatu ondotik iaz bezala, epaileek Alazne Untxalo hautatu zuten eta hortaz maila horretako txapela berriz ere iturenera joan zen. Bigarren postua eskuratuz Iker Gorosterrazuk Alazne Untxalorekin batera ekainaren 23an Altsasun jokatuko den Euskal Herriko finalean pare hartzeko txartela eskuratu zuen.