Horrelako hondamenik ez zuen nehorrek ezagutzen herrian. Peñaplatatik hasi eta Arleunerako mendiek ixuri zituzten ur, lohi eta urek kalte izugarriak sortu zituzten: hainbat bide eta zubi deseginak; Madaria auzoko pista moztua; baserri inkomunikatuak (Iriartekoborda, Ixtilartekoborda...); Errotaren ingurua hondatua; kanposainduko alde berria lohi eta harriz beteta; leizeko zola, zubiak eta argiteria xehatuak; baserriak urak hartuta (Bereko Benta, Etxeaundikoborda...). Galtzagorritegin dagoen euria neurtzeko tresnak 205 litro hartu zituen metro koadroko.
Herritik bertatik ez da errekarik pasatzen, baina halere, ez gara libratu: Urbia eta Arleunetik jautsi zen uholdeak kalteak sortu zituen, batez ere, Lapiztegia karrikan: zenbait tokitan brea altxatu zen; Irietxea pentsutegian eta Tinta Bentan ura sartu zen; Arleunetik eroritako mendi puska Beskorrea parera ailegatu zen; Axkoa eta Odiaraino ailegatutako errekek ere kalteak eragin zituzten...
Biharamunean, agertu zen Nafarroako Gobernuko ordezkaria eta dirulaguntzak emanen direla erran zuen, baina bazterrak moldatu arte denbora ganen da.