Igande honetan, maiatzaren 6an eginen da Rafael Maritxalar Lesakako XIII. Herri Lasterketa. Batzoki elkarteak antolatu du aurtengoan ere, Lesakako Udalaren eta bertze zenbait entitateren laguntzarekin.
Lasterketa bi mailatan banatu dute: gazteentzat A zirkuitua, eta nagusiagoentzat B zirkuitua. Gazteen mailan aurre-benjaminak, benjaminak, alebinak, infantilak eta haurrak arituko dira, eta aurre-benjaminetan ez ezik gainerakoetan neskak eta mutilek egin beharreko bidea desberdina izanen da: itzuli bat guttiago neskak. Gaztetxoenek 10:00etan dute hitzordua, eta hortik aitzinera gainerakoek.
Nagusien txanda, berriz, 12:00etan hasiko da. Maila honetan ezinduek, kadeteek, jubenilek, juniorrek, seniorrek eta helduak (35 urtetik goiti) aritzeko aukera izanen dute.
Behin froga nagusia bukatzean, sari banaketak eginen dira: kategori bakoitzeko hiru lehenengoei eta lehenengo lesakarrari emanen zaizkio. Federatu gabeko taldeen kasuan, hiru lehenengoetan gelditzen direnek, arkume bat eskuratuko dute.