Hilabete bat eskas pasatu da Iñaki Pikabeak Herriko Ostatua utzi eta Julen Zubieta lesakarrak hartu duen arte. Uste baino denbora guttiagoz ireki ditu ateak berriz ere herriko gazte gehienen bilgune den ostatu-jatetxeak.
Eskarmentuko sukaldaria
Ostatuko arduradun berriak 26 urte ditu eta sukaldaritza ikasketak egin zituen Donostian. Ez zaio lan arrotza egiten sukaldekoa, urte franko pasatu baititu dagoenekoz hainbat jatetxe eta ostatutan lanean. Herrikon ere 4 urtez aritu zen Iñaki Pikabearekin. Orain, aldiz, etapa berria hasiko du, langile izatetik ostatuaren nagusi izatera pasatuz.
Ilusioa eta lan egiteko gogoa
Sukaldari, zerbitzari eta gainontzeko langileen lantaldea osatuta, pasa den apirilaren 1ean ekin zion abentura berriari. Ilusioz eta lan egiteko gogoz dagoela aitortu digu Julenek. «Hasierak ez dira inoiz errazak izaten baina Herriko Ostatuak urte aunitzeko esperientzia du Etxalarren, eta hemendik aitzinera ere ongi joanen den ilusioa dugu guztiok. Lana gogotik eginen dugu, gurera etortzen diren guztiei zerbitzu ona eskaintzeko».
Ea bada, orain arte izan den bezalaxe, Julen Zubietarekin ere kalitatezko otorduak, zerbitzu profesionalak eta giro onak ez duten hutsik egiten.