Endarlatsa-Irun errepideko trazatu berriaren proiektua irailerako akautua egonen da, urtarrilaren 31n Nafarroako eta Gipuzkoako ordezkariak dituen batzorde teknikoaren bileran jakinarazi zenez. Bidasoa errekaren gainean zubi berri bat eginen dela ere aurreratu zuten. Gipuzkoako Diputazioak Sener enpresari eman zion proiektua idazteko ardura eta iazko azaroaren 29an hasi ziren lan horretan. Aurreikuspenen arabera, aurtengo irailean trazatuaren proiektua eta 2006ko maiatzean eraikuntza proiektua eginak egonen dira. Hiru karril eginen dira bidearen %73an eta lau karril Irunetik hurbilen dauden 700 metrotan.