Laxoa elkarteak antolatzen duen VIII. Pasaka Txapelketako lehen jardunaldia joan den larunbatean jokatu zen Iruritako Aranabian. Lau partida jokatu beharra ziren, baina arazo batzuengatik bi besterik ez zituzten jokatu. Irurita D taldea Irurita Cren aurka aritu zen, baina gauza handirik ez zituzten egin ahal izan, eta Iñaki Etxandi, Migel Bidegain eta Martin Alfarok lehen garaipena lortu zuten 9 eta 4 nagusituz. Bigarren partidan Irurita E taldea Oitzen aurka aritu zen. Etxekoak erraz nagusitu ziren aurkariei aukerarik utzi gabe. Cesar Iñarrea, Jesus Etxenike eta Guillermo Etxenike Baztandarrek 9 eta 1 irabazi zieten Malerrekako Iker Bereau, Ugutz Zelaieta eta Jose Agustin Mindegiari. Lehen jardunaldiko bertze bi partidak heldu den astean jokatuko dira, Irurita A eta B taldeen artekoa aste tartez, eta Ipar Izar eta Doneztebekoaren artekoa asteburuan.
Bigarren jardunaldiari erreparatuz, heldu den larunbatean, otsailak 3 jokatuko da arratsaldeko 16:00etatik aitzinera. Oitz Irurita Aren aurka arituko da, Ipar Izar Irurita Dren aurka, Irurita E herri bereko D taldearen aurka, eta azkenik, Doneztebe Irurita Cren aurka.