Arkupeak erretiratuen elkarteak abenduaren 16an eginen duen urte bukaerako bazkaria aprobetxatuko du presidente karguan 20 urte eman dituen Felipe Ganboa omentzeko. Besta eguna 11:30ean Doneztebeko elizan, aurten hil diren kideen omenez emanen den mezarekin, hasiko dute. Bazkaria 13:30ean izanen da kiroldegian, Marisol jatetxearen eskutik. Ohi bezala, bazkal ondoan dantzaldia izanen da 19:00ak arte. Menu berezian, arrain zopa, fritoak, otarrainxkak plantxan, limoi-sorbetea, entsalada, bildots errea patatekin eta bukatzeko txanpaina, tarta eta izozkia izanen dute, ardo, kafe eta koparekin hornitua.
Ospakizun horretan parte hartu nahi dutenek, 30 euro ordainduz izena eman beharko dute nahitaez azaroaren 13tik 23ra elkartera deituz 20:00etatik aitzinera edo delegatuekin kontaktuan jarriz. Joan etorriak egiteko autobusak hainbat lekuetatik aterako dira: Goizueta eta Zugarramurditik 9:30ean; Irun eta Leitzatik 10:00etan; Ezkurratik 10:15ean; Bera, Etxalar, Elizondo eta Almandoztik 10:30ean eta Zubieta, Sunbilla eta Oronoztik 10:45ean.