Irailaren 16an urtero bezala Joaldunen eguna ospatuko da Iturenen. Goizeko 7:30etarako joaldunak plazan elkartuko dira dena prestatzeko eta 10ak aldera joaldunen eta herriko trikitilarien ibilaldia egiten hasiko dira baserriz-baserri.
Goiz guztian baserrietan ibiliko dira eta baserritarrak urtero bezala ilusio haundiz hartuko dituzte bisitariak egun honetan. Pintxo goxo eta edari frexkoa denei banatzen dizkiete. 11:00etan herriko plazan artisauen azoka ikusgai egonen da.Eguerdian herrira jautsi eta herriari buelta eman ondoren 13:30ak aldera aizkora apostua izanen da Plazan. Aurtengoan Larretxea Nazabalen aurka arituko da. Ondotik bertsolarien txanda izanen da eta plazako guztia akitu ondotik, 15:00ak aldera, Herriko Etxeko sabaian bazkaria izanen dute. Lagunartean eta giro ederrean bazkaldu ondoren arratsalde eta gauez dantzaldia izanen da, Joaldunen egunari akabaila emateko.