Joan den igandean, abuztuaren 20an, Sarako Kontrabandisten lasterketa egin zen. Berrogeita seigarren edizio honetan ere, Sarako plazan abiatu eta Larrungo mazeletan dagoen Zazpi Fago bitarteko bidea egin zuten korrikalariek, berriz ere plazara itzuliz. Duela bi urte bezalaxe, Fernando Etxegaraik lortu zuen garaipena. 9 kilometro inguru dituen ibilbidean beratarrak ez zien aukerarik eman aurkariei. 38 minutu eta 36 segunduko denborarekin probaren marka berria egin zuen Etxegaraik, Ramuntxo Lamothe saratarrak iaz egin zuen erekorra 20 segunduan hobetuz.
Bigarren postua Patxi Iratzoki igantziarrak eskuratu zuen, Honek ere lasterketa polita egin zuen eta bere marka hobetu zuen, 40 minutu eta 16 segunduko denborarekin. Iratzokik ere Berako herriaren izenean parte hartu zuenez, herrikako sailkapena Berak irabazi zuen. Hirugarren postua Joxelu Loiarte beratarrak eskuratu zuen, 43 minutu eta 49 segunduko denborarekin eta laugarrena Iñigo Lasaga etxalartarrak, 44 minutu eta 29 segunduko denborarekin. Biek Etxalarren izenean aritu zirenez, herrika bigarren izan zen Etxalar. Lau lehenbiziko sailkatuak, Manttale mendi lasterketa taldekoak dira. Jakes Bernet eta Alain Balaire saratarrek, zortzigarren eta hamargarren postuak erdietsi zituzten eta, horri esker, taldekako sailkapenean hirugarren izan zen Sara.
Emakumeetan Maika Ariztegi garaile
Emakumetan berriz, garaipena Maika Ariztegi iturendarrarentzat izan zen, lasterketa burutzeko 52 minutu eta 43 segundu eman zituen. Azkainerentzat ari zen Bernadette Bideondok bigarren postua lortu zuen, 53 minutuan bukatuz. Luzaiderentzat ari zen Josune Zabalak podiuma osatu zuen, lasterketa ordubete eta 7 segundutan bukatu ondotik.
Arestian aipatu bezala, 38 minutu eta 36 segunduko denborarekin, Fernando Etxegaraik Ramuntxo Lamothe saratarrari lasterketaren marka kendu zion. Halere, azken honek, maizenik irabazi duenaren marka dauka oraindik, bortz garaipenekin.