Promozio mailako finalarekin hasi zen ortziraleko jaialdia eta Mikel Mikelarena eta Xuban Ilarregi oiztarrek 35-31 irabazi zieten Osesi eta Agirrezabalari. Oizko bikotea erregularrago izan zen eta hasiera berdindua izan bazen ere, gehienetan aitzinetik izan ziren. Hamalaunakoa izan zen azken berdinketa eta sei tanto segidan eginez hautsi zuten partida Mikelarenak eta Ilarregik (20-14). Lauzpabortz tantoko aldeari eutsi zioten ia partida osoan, baina Oses eta Agirrezabalak tanto bakarrera hurbiltzea lortu zuten (30-31). Azkenean, ordea, Mikelarena eta Ilarregi nagusi (35-31). Mikelarenak 14 tanto egin zituen eta Ilarregik 7.
Segidan, lehen mailako finala jokatu zuten Eloi Otxandorena eta David Mitxeo doneztebarrek, Matxin III.a eta Ion azpeitiarren kontra. Partida bikaina eskaini zuten lau erremontistek, txapelketa borobiltzeko ezin hobea, Labrit bete zuten pilotazaleen gozamenerako. Arras berdindua eta lehiatua joan zen partida osoa. Doneztebarrek lau tantoko aldea lortu zuten (11-7), baina hamabina berdindu zuten azpeitiarrek. Segidan, Matxinek eta Ionek lortu zuten bortz tantoko aldea (14-19), baita sei tantokoa ere (18-24), eta beteranoak nagusitzen ari zirela zirudien, baina hogeita launa berdintzea lortu zuten Otxandorenak eta Mitxeok, baita 27-25 aitzinetik jartzea ere. Hogeita hamarnako berdinketaren ondotik, bi tantoko aldea hartu zuten azpeitiarrek (30-32), baina azken txanpan hobeki aritu ziren Otxandorena eta Mitxeo, txapela janzteko (35-33). Otxandorenak 17 tanto egin zituen eta Mitxeok 7, horietako bi sakearekin. Matxinek ere 14 tanto egin zituen eta Ionek 8.
