77 bikote mus txalpelketan eta Luismi Apezetxea eta Patxiku Ganboa historikoak txapeldun
Ortziraleko ekitaldiak aurrebenjaminek eta benjaminek kiroldegian jokatu zituzten eskubaloi partidekin hasi ziren. Gauean Santa Luzia Plazan jokatutako mus txapelketan 77 bikotek hartu zuten parte eta horien artean, Errekako bi historiko, Luismi Apezetxea eta Patxiku Ganboa izan ziren txapeldun, finalean Xabier Bakedano eta Mikel Villamea gazteei irabazita.
Biharamunean, kirola izan zen protagonista. Goizean kategoria ttikietako eskubaloi taldeen arteko partidak jokatu zituzten eta judo eskolakoen erakustaldia ere izan zen. Larunbat arratsaldean ere eskubaloi partida gehiago izan zituzten: jubenilek eta kadete mutilek; senior neskak eta jokalari ohiak elkarren artean eta senior mutilak jokalari ohien kontra. Atsedenaldian Erreka Dantza Taldeak emanaldia eskaini zuen eta Zubietako joaldunak ere hurbildu ziren kiroldegira. Bestak segida izan zuen arratsean eta 325 lagun bildu ziren herri afarian. Joseba Legarra presidenteak eta Txomin Mindegia historikoak solasaldi hunkigarriak egin zituzten eta Berasategi anaiek, eskubaloian jokatzen ez ezik, kantatzen eta giroa jartzen ere badakitela erakutsi zuten. Trikidantzekin erromeria izan zuten eta, ondotik, J&J DJ aritu zzen.