Ortzirale eta larunbat honetan ospatuko dute Donezteben Erreka Kirol Elkartearen Eguna. Baina egun horren aurrekari, sari bikoitza hartu zuen Errekak asteartean Noainen ospatu zen Nafarroako eskubaloiaren galan. Hainbat sari eta oroigarri banatu zituzten eta horien artean, Errekako Marina Zabala Sarasolak kategoriako jokalari onenaren saria jaso zuen. Gainera, Erreka elkartea 50. urteurrena ospatzen ari dela eta, hori ere saritu nahi izan zuen Nafarroako Eskubaloi Federazioak eta oroigarri bat eman zion taula gainera Errekako ordezkari igo zen Pablo Elizondori.
50. urteurrenekoa urte bikaina izaten ari da Errekarentzat. Gizonezkoen talde nagusiak liga irabazi eta, historian lehen aldiz, lehen maila nazionalera igotzea lortu du, Alacanten jokatutako igoera fasean nagusitu eta gero. Emakumeen talde nagusiak, berriz, liga eta kopa irabazi ditu, biak lehen aldiz.
