Herriko Etxeko harrera Arantxa Arregi alkateak, Juan Telletxea kirol zinegotziak eta Maider Ilarregi, kultura eta besta zinegotziak gidatu zuten, baina bertze zinegotziak ere bertan ziren. «Ez da ohikoa hiru talderi batera harrera egitea eta zoriontzea», aipatu zuten. Baina, harrera ez zen bakarrik lortutako tituluengatik eta igoeragatik, «azken unera arte borroka eginez, kirola egiteak merezi duela erakusten duzue eta eredu zarete Doneztebeko eta Malerrekako haur eta gaztetxoentzat. Dena bertako jendearekin lortu duzue, gainera, ez da bakarrik irabaztea, lagun artean irabazi duzue». Aitzinera begira ere, Doneztebeko herriko etxeak bai Erreka Kirol Elkartea, baita Doneztebe Futbol Taldea babesten eta laguntzen segituko duela adierazi zuen. «Gozatu une hauetaz, meritu guziarekin irabaziak dituzue eta! Gora gure kirolariak!».
Oraindik herriko bestetarako aste batzuk falta baldin badira ere, zapi gorriak eman zizkieten jokalari eta entrenatzaile guztiei (Iban Ezkurra Errekako emakumeen entrenatzailea, Gorka Laborda Doneztebe Futbol Taldeko entrenatzailea eta Iban Mindegia, Errekako gizonezkoen entrenatzailea). Taldeetako kide guziek elkarrekin atera zuten argazkia herriko etxeko atarian, beraiek lortutako garaikurrekin eta kalejiran ibili ziren Doneztebeko karriketan.