Estefi Etxebeste iturendarra laugarren izan da Zarauzko Bi Harri Txapelketan

Ttipi-Ttapa 2026ko apirilaren 27a

Zarauzko Bi Harri Txapelketaren emakumeen seigarren edizioan parte hartu duten harri altxatzaileak, tartean Estefi Etxebeste iturendarra. Argazkia: Ibon Errazu Uria

Zarautz Kirol Elkarteko Herri Kirol sailak antolatua, Zarauzko Bi Harri Txapelketaren edizio berri bat jokatu da apirilaren 25ean Aritzbatalde pilotalekuan. Aurtengoan ere, emakume zein gizonezkoak aritu dira harri baldarrekin lehian. Emakumezkoen kasuan, aurtengoa dagoeneko seigarren edizioa izan da eta Estefi Etxebeste iturendarra izan da eskualdeko ordezkari bakarra. Laugarren izan da, zazpi minutuko txandan Jai Txiki harria (68 kilo) eta Molarri harria (64 kilo) hamabosna aldiz altxatu ondotik, 30 altxaldi denera.

Maddi Gesalaga zarauztarra izan da txapeldun 34 altxaldirekin (17 eta 17), Lierni Osa zarauztarra bigarren 33 altxaldirekin (17 eta 16) eta Ainitze Zumeta zarauztarra hirugarren 32 altxaldirekin (16 eta 16). Etxebesteren gibeletik bosgarren izan zen Eider Garcia Durana gasteiztarra 23 altxaldirekin eta Ane Atxutegi usansoloarra seigarren 19 altxaldirekin.

Estefi Etxebeste iturendarra lanean Zarauzko Bi Harri Txapelketan. Argazkia: Ibon Errazu Uria

X. Gizonezkoen Zarauzko Bi Harri Txapelketan, Mikel Lopetegi Urra nagusi

Urtero bezala, gizonezkoek 7 minutuko txanda bat egin behar izan dute, Jai Txiki (117 kilo) eta Mollarri (119 kilo) harriak txandakatuz. Mikel Lopetegi Urra zarauztarra nagusitu da 27 altxaldirekin, Xabat Olaizola zarauztarra bigarren (22 altxaldi), Hodei Iruretagoiena Izeta IV.a zarauztarra hirugarren (21 altxaldi), Beñat Telleria lasartearra laugarren (20 altxaldi), Gorka Etxeberria oriotarra bosgarren (17 altxaldi) eta Jon Marijuan seigarren (12 altxaldi).

Kirola Malerreka Ituren

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun