Erremonteko Berria Txapelketako lehen finalerdian Doneztebeko bi aurrelari ziren aurrez aurre: Josetxo Ezkurra II.a beteranoa eta duela hilabete eskas profesionaletan debuta egin duen Imanol de Rueda Goñi Martixpe. Azkenean, Ezkurra II.ak eta Goikoetxea VI.ak lortu zuten garaipena. Martixpek eta Barrenetxea IV.ak lehen jokoak irabazi zuten (8-15), baina bigarrenean partida berdindu zuten Ezkurrak eta Goikoetxeak (15-11) eta joko erabakigarrian ere 8-6 irabazi zuten, 5-6ko markagailua irauliz.
Bigarren finalerdia ere berdindua izan zen eta lehenbizikoaren antzekoa. Arluziagak eta Azpirozek lortu zuten finalerako txartela, lehen jokoa Segurolak eta Aldabek irabazi zuten arren (13-15). Bigarrenean berdindu zuten Arluziagak eta Azpirozek (15-9) eta hirugarrena ere irabazi zuten (8-6).
Beraz, finalean, Josetxo Ezkurra II.a doneztebarra eta Goikoetxea VI.a, Arluziagaren eta Azpirozen kontra ariko dira.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.