Julen Duhauk zuzendutako film laburraren estreinaldia apirilaren 20an izango da Bilbon
Eguneroko legez film laburrak lau emakumeren egunerokoa du ardatz: lanera bidean autobus berean elkartzen dira goizero, eta hamar minutuko ibilbide laburrean elkarrizketa xumeek, isiluneek eta keinu txikiek garrantzi berezia hartzen dute. Istorioak eguneroko bizitzan sortzen diren harreman eta bizipen txikiei erreparatzen die, besteak beste zaintza, bakardadea edo lan baldintzak bezalako gaiak modu sotilean jorratuz.
Filmaren istorioaren zati handiena autobus barruan gertatzen bada ere, hasierako eszenak herri giroan kokatzen dira. Horietan, Zubietako kale nagusia, zubia eta markesina ageri dira, eta litekeena da herritar askok kokalekuak berehala ezagutzea.
Ekoiztetxetik, gainera, eskerrak eman nahi izan dizkiete Zubietako Udalari eta Ezkurrako Udalari, prozesua errazteagatik eta emandako laguntzagatik.
Eguneroko legez film laburraren estreinaldia apirilaren 20an izango da Bilbon, eta ondoren beste hainbat tokitan aurkezteko asmoa dute sortzaileek. Horien artean, Malerrekara bertara gerturatzea ere gustatuko litzaieke, film laburra tokian bertan erakusteko.