Larunbatean Doneztebeko Ezkurra pilotalekuan jokatutako finalerdian Mitxeo menperatu zuen (30-25)
Partida ikusgarria jokatu zuten Otxandorenak eta Mitxeok. 23 tanto egin zituen aurrelariak eta 22 atzelariak. Hasiera berdindua izan zuten eta hirunako berdinketaren ondotik 3-5 aitzinetik ere izan zen Mitxeo, lehen eta azken aldiz. Izan ere, 7-0ko partzialarekin aitzinetik jarri zen Otxandorena (10-5) eta tanto bakarrera hurbildu bazen ere (10-9), ez zuen partida berdintzeko aukerarik izan Mitxeok. Sei tantoko aldea (19-13 eta 20-14), baita zortzikoa ere (23-15) izan zuen Otxandorenak. Baina Mitxeok ez zuen etsi eta hirura hurbildu zen (23-20 eta 24-21). Baina Otxandorenak ez zuen barkatu eta 28-21 aitzinetik joan ondotik, azkenean 30-25 irabazi zuen.
Jaialdiko lehen partidan, Koteto Ezkurra III.a doneztebarrak eta Agirrezabalak 30-18 irabazi zieten Osesi eta Baztani. Jaialdia hasteko, larunbat eguerdian jokatutako Bortz Kirol txapelketako finalistak, David Albiasu txapelduna eta Julen Iriarte txapeldunordea, Arantxa Arregi alkatearekin eta erremontistekin batera, Palestinako genozidioa salatzeko pankartarekin atera ziren kantxara.