108 urteren ondotik, abuztuan itxi zuten Casa Ibarrolako Maite Ibarrolarentzat eta bere ama zen Eulalia Manterolarentzat izan dira zilarrezko titareak
108 urteko historiaren ondotik, joan den abuztuan itxi zuten Casa Ibarrola denda, Maite Ibarrolak erretiroa hartu zuenean. Horregatik, emozioz hartu zuen zilarrezko titarea. «Negozioa ez zen nire amarekin hasi, baina bera beti hor egon zen, bera zen jostuna. Titarea beretzat da lehenik, gero familia osoarentzat eta Malerreka guziarentzat».
Santa Luzia egun berezia
Zilarrezko Titareak meza ondotik eman zituzten eta eliz atarian jende aunitz bildu zen aurten ere. Eskualdeko eskulangileen postuak, Zubietako taloak, Mendaur trikiti eskolako ikasleen musika doinuak eta batukada ere izan zituzten. San Miguel ikastetxeko guraso elkarteak, Endanearekin elkarlanean, bazko loreak ere saldu zituen. Ez du, beharbada, garai bateko jendetzarik erakartzen, baina giro polita izan zuten larunbatean Donezteben.