Tradizioa sobera aldatu gabe, ohiko egitaraua izanen da aurtengo Doneztebeko feria egunean ere, nahiz eta aurten dermatosi nodular kutsakorra tarteko ezin izanen da aziendarik plazaratu.
Aziendarik ez, baina lanerako tresnak eta makinak ikusteko aukera izanen da Bordatxoko aparkalekuan goizean. Ikusteko bakarrik ez, erosteko aukera ere izanen da Donezteben. Goizean hasi eta ilunabarrera arte, salgaiak paratuko dituzte alde zaharrean herriko merkatariek, eskualdeko ekoizleek zein kanpotik joandako saltzaileek. Jatekoak erosteko aukera izanen da: gozokiak, eztia, ogia, taloa, gazta...
Jatekoez aparte, arropa, oinetakoak, galtzerdiak, aterkiak eta bertzelakoak ere izanen dira salgai. Bertze urte batez, Mendaur institutuko ikasleek ere beren postua paratuko dute eta baita Saharaztan elkarteak ere.
Herriko ostatua irekia
Bestarako gogoz daudenek, herriko ostatura joateko aukera izanen dute. Izan ere, bertze urte batez, Lapaitza Bertizaranako eta Malerrekako Gazte asanbladak Herrigunean ostatua irekiko du. Egun osorako egitarau zabala prestatu dute Lapaitzako kideek.
Egitarauari dagokionez, iazko egitarauaren antzera, goizean azoka izanen dute, eta kafea eta pintxoak dastatzeko aukera izanen da. Eguerdian bermut musikatua izanen da eta 14:30ean bazkari autogestionatua eginen dute.
Bazkalondoan mahai inguruan elkartu ondotik, 19:00etan hasita, kontzertuak izanen dira. 3. Mundu Gerra, Matxarda eta Adur taldeak ariko dira eta besta borobiltzeko, DJ Muffinen txanda izanen da. Goizaldera arte luzatuko da besta.