Azaroaren 1ean, larunbat arratsaldean ariko dira Luzaiden, aurrelaria Otanorekin eta atzelaria Zeberio II.arekin
Larunbatean 18:00etan hasiko den jaialdia Luzaideko Argioala Emakume Elkartearen aldekoa izanen da. Lehen partida ere maila handikoa izanen da, Xanti Uterga doneztebarra eta Agirrezabala, Matxin III.aren eta Ionen kontra ariko baitira.
Final nagusian, berriz, 51 urterekin bigarren gaztaroa bizitzen ari den Patxi Zeberio elduaindarra eta David Mitxeo doneztebarra, Eloy Otxandorena doneztebarraren eta Otano agoiztarraren kontra ariko dira. Azken hauek, bikote eginez, Udaberriko eta Nafarroako torneoak irabazi dituzte aurten eta beharbada faboritoxeagoak dira. Baina, Zeberio II.aren beteranotasuna eta jakinduria eta 20 urte bertzerik ez dituen David Mitxeoren ahala eta teknika ere kontuan hartzekoak izanen dira.
Partiden aitzinetik, Luzaideko bolanteen emanaldia ere izanen dute ikusgai.