Otxandorenak eta Otanok irabazi dute Udaberriko erremonte txapelketaren finala Donezteben

Ttipi-Ttapa 2025eko ekainaren 30a

Otxandorena eta Otano txapeldun eta Zeberio II.a eta Barricart txapeldunorde, ortziralean Doneztebeko Ezkurra pilotalekuan, Arantxa Arregi Doneztebeko alkatearekin eta bertze ordezkariekin.

Eloy Otxandorena doneztebarra eta Otano suertatu dira udaberriko erremonte txapelketako txapeldun, ortziralean gainezka zegoen Doneztebeko Ezkurra pilotalekuan jokatutako finalean, Zeberio II.ari eta Barricarti 35-24 irabazi ondotik. Aurrelari doneztebarra izan zen onena eta 16 tanto egin zituen eta Otanok ongi lagundu zion gibeleko koadroetan.

Hasieratik (0-2) bukaerara aitzinetik izan zen bikote urina, berdinketarik izan ez zuen partidan. 2-8 aizinetik izan ziren eta gorriak bi tantora hurbiltzea lortu bazuten ere (11-13), gehienetan lauzpabortz tantoko aldearekin izan ziren gerora txapeldun suertatu zirenak. Azkenean, 24-29tik sei tanto segidan egin eta txapela lortu zuten Otxandorenak eta Otanok, partidako alderik handienarekin (24-35).

Final bikaina jokatu zuen Otxandorenak eta 16 tanto egin zituen. Argazkian pilota astintzen, Zeberio II.a begira duela.

Jaialdia hasteko jokatu zen partidan, Xanti Uterga eta David Mitxeo doneztebarrek 30-27 irabazi zieten Matxin III.a eta Ion azpeitiarrei.

Bi partiden artean omenaldia eskaini zitzaien ligako txapeldun izan diren Errekako eskubaloi taldeari eta Doneztebe Futbol Taldeari.

Lehenengo partidaren eta finalaren artean, Doneztebeko Udalak eta Erremonte Fundazioak ongi merezitako omenaldia eskainiko zien aurten ligako txapeldun izan diren Errekako gizonezkoen eskubaloi taldeari eta Doneztebe Futbol Taldeari.

Kirola Malerreka Doneztebe

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun