Gastuei dagokienez, inbertsioetan joanen da erdia baino gehiago, 342.359,22 euro, ondasun arruntetako eta zerbitzuetako gastuetan 115.710 euro, transferentzia arruntetan 115.028,24 euro eta langileen gastuetan 81.730 euro. Sarrerei dagokienez, transferentzia arruntetan 198.088 euro eskuratuko ditu udalak, kapital transferentzia eta beste diru sarreren bidez 147.666,72 euro eta zuzeneko eta zeharkako zergen bidez ia 100.000 euro, besteen artean.
Sarekoa auzoko eta Azkarateko bideak hobetzeko lanak esleituak
Hain zuzen, udal aurrekontuetan sartuak zeuden bi obra esleitu zituen Zubietako Udalak martxoaren 20ko udal batzarrean.
Alde batetik, Sarekoa auzoan Goienetxeren bizi bordara doan bidearen zatian hormigoia emateko lanak esleitu ditu. Bide honek azken hamar urteetan hormigoitutako zenbait zati ditu; hala ere, zoladurarik gabeko zati batzuk ditu oraindik (hormigoitu gabe), eta Zubietako Udalak, hain zuzen ere, 420 metro hartzen dituzten hiru zati hormigoitu nahi ditu. 420 metroko tarte horiek hobetuta, Sarekoa auzoko Goienetxeren Borda eta Andreseneko Bordako etxebizitzetarako sarbidea hobetuko da. Obra hau 57.919,24 (BEZa barne) eurotan atera du Udalak. Lana Arrixko Igeltseritza enpresari esleitu zaio. Urriaren 30erako lanak akituak egon beharko dira.
Bertze aldetik, ganadu bideak hobetzeko lanak ere eman dira. Azkarateko bideko bi tokitan hondatutako hormigoizko zatiak daude, konponketa bat behar dutenak. Tarte batek 17 metroko luzera eta 1,40 metroko batez besteko zabalera du eta beste tarte batek 2 metro luze eta metroko zabalera. Bide horiek Zubietako mugapeko larreen eta abeltzaintzako ustiategien herri lur eremu handi batera doaz.
Beste alde batetik, Landako bidean pasabide kanadarra eraiki nahi da, ganadua Zubietako herrigunearen ondoko Landa parajeko belardi eta baratzeetara joan ez dadin. Obra hauek 15.781,11 (BEZa barne) eurotan atera du Udalak. Lan hauek ere Arrixko igeltseritza enpresari esleitu zaizkio eta urriaren 30erako akituak egon beharko dira.