Eliza inguruan izanen da goizeko azoka eta bertako artisauak eta eskulangileek paratuko dituzte postuak. Arratsaldean, aldiz, ANA Autismoaren Nafarroako elkartearen eskutik solasaldia izanen da. Autismoaz ariko dira, eta baita elkarteak egiten duen lanari buruz ere. Hitzaldia eskolan izanen da, 17:00etan, debalde. Gainera, haurrak zaintzeko zerbitzua ere izanen da.
19:00etan hasita bertso poteoa eginen dute Ekhiñe Zapiain eta Kattin Madariaga bertsolariekin, Maylin ostatutik hasita.
20:00etan, aldiz, Mendi Abesbatzak urteroko Eguberrietako kontzertua emanen du Mendi Ttikirekin eta Donostiako Txistulari Bandarekin batera. Emanaldia elizan izanen da eta Eguberrietako kantak izanen dira nagusi.
Kontzertuan abesbatzako hainbat bakalari ariko dira: Loli Salaberri, Alicia Telletxea eta Xalbador Arriola.