Hamasei lagunek parte hartu dute Doneztebeko Disko Golf txapelketan

Ttipi-Ttapa 2024ko urr. 8a, 13:30

Doneztebeko Disko Golf txapelketan parte hartu zuten haurrak, Mikel Ibarrolarekin.

Hamasei lagunek parte hartu dute Doneztebeko Udalak lehen aldiz antolatutako Disko Golf txapelketan. Intzakardi parkean aritu ziren, lau saskira (par 12). Haurrekin egin zuten txapelketa bat eta Noa Gallego suertatu zen garaile (18 jaurtiketa), Ekai Oteiza bigarren (19), June Telletxea hirugarren (23), Maren Mariñelarena laugarren (23) eta Inari Baleztena bosgarren (26).

Doneztebeko disko golf txapelketan haurrak jokoan.

Gero, helduekin, ikastaro moduko ordubeteko saioa egin zuten, arauak, disko motak, jaurtiketa motak eta bertze jakingarriak ikasteko.

Helduek ere ikasi zuten Disko Golfeko arauak, jaurtiketak eta bertze hainbat jakingarri.

Mikel Ibarrola bigarren Lekunberrin

Bertze aldetik, berriko, Lekunberrin Aralar Erronka jokatu zen, 2024-2025eko Espainiako Disko Golf Koparako baliagarria. Aipatzekoa da Baxi Basajauna taldeko Mikel Ibarrolak bigarren postua eskuratu zuela, MP50 beteranoen kategorian. Bilbao DG taldeko David Angulo nagusitu zen kategoria honetan eta Jose Sanpedro taldekidea hirugarren izan zen.

Mikel Ibarrola (eskuinean) bigarren izan zen Lekunberrin MP50 kategorian, Bilboko David Angulo eta Jose Sanpedroren gibeletik.

Aipatzekoa da rankingeko lehen postuan dagoen Iñaki Gonzalez Olaizola, Baxi Basajaunako kirolaria ez zela Lekunberrin izan, lesionatua zegoelako. Halere, asteburu honetan Santiagon jokatuko den Espainiako txapelketan parte hartuko du eta bera izanen da MP50 kategorian garaipena lortzeko faborito nagusia.

Kirola Malerreka Doneztebe

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun