Javier Urriza eta Ibai Martirena (Aburuza) dira Sagardoaren Txapelketako txapeldun berriak, ekainaren 24ko finalean finalean Josetxo Ezkurra doneztebarrari eta Xabier Azpirozi (Alorrenea) 2-0 (15-13 bikoitza) irabazita. 2023ko edizioan txapeldunorde izan ondotik, arantza atera dute. Gainera, Urrizak bolada onean jarraitzen du, abenduan Azpirozekin batera binakako txapelketa irabazi eta gero. Hernaniko Galarreta pilotalekua ia bete egin zen eta finalak maila bikaina izan zuen. Urriza Erremontari sariko finaleko onena izendatu zuten.
Aurrelarien arteko lehia ikaragarria
Partida batez ere aurrelariena izan zen. Urrizaren eta Ezkurraren arteko lehia ikaragarria izan zen. Urrizak 16 tanto egin zituen, baina Ezkurrak aurre egiteaz gain, tanto gehiago ere egin zituen, 18. Iruñeko aurrelariak huts bakarra egin zuen, Doneztebeko aurrelariak, berriz, lau egin zituen. Zenbakiak, beraz, antzekoak izan ziren. Alde handiagoa gibeleko koadroetan izan zen. Ohi ez bezala, Azpirozek ohi baino huts gehiago egin zituen, bortz, eta Martirena izan zen ia hutsik egin ez zuena, bi final osoan. Urrizaren jakiteak une erabakigarrietan erabaki zuen norgehiagoka, bi jokoak hamahirunako berdinketarekin iritsi ondoren.
Finala joko ikusgarriarekin hasi zen, bizia; bikote urdinari pixka bat gehiago kostatu zitzaion jokoan sartzea, baina berehala gorrien abantaila berdindu zuten. Jokoaren bigarren zatian, etengabeko berdinketak izan ziren, Galarretan ikusi zen berdintasuna islatzen zutenak. Ezkurra II.ak eta Azpirozek 12-13 agintzen zuten, baina azken tantoak gorrientzat izan ziren, Urrizaren bi eta Martirenaren bat.
Bigarren jokoan, Iruñeko aurrelariak eta Lekunberriko atzelariak, atsedenaldi luzean, 8-4 irabazten ari zirenean, garaipena ia eskuan zutela zirudien; baina Josetxo Ezkurrak eta Xabi Azpirozek markagailua irauli eta aitzinetik jarri ziren, 9-11. Hernaniko pilotalekuko harmailak betetzen zituzten zaleek argi ikusten zuten berdinketa hausteko joko batez gozatzeko aukera. Ez zen horrela izan, Urrizak eta Martirenak, hasierako jokoan bezala, 13nako berdinketaren ondotik gehiago asmatu zutelako, eta 15-13ko emaitzarekin bigarren jokoa, partida eta txapela irabazi zuten.