Poloniako Wisla Ploc taldean lau titulu lortu ditu Mindegiak, azken biak, Poloniako kopa eta superliga aurten. Europa Ligak finalista izan da bitan (2020-21 eta 2021-22) eta Txapeldunen Ligako final laurdenetara ailegatu zen 2022-23 denboraldian. Gainera, bakarka, Niko Mindegia hirutan izendatu dute Poloniako ligako erdiko jokalari onena
Ez da Mindegiaren lehen esperientzia Frantziako ligan. Chambéry Savoie taldearekin Frantziako Kopa irabazi zuen 2019an. «Azken denboraldi honen hasieran garbi nuen, Wisla Plocken segituko nuela edo Frantziako ligara itzuliko nintzela. Gustura nengoen Wislan, kontratua berritzeko eskaintza ere izan dut, baina Frantziara itzuli nahi nuen».
Errekako harrobian hazia, Niko Mindegia Portland San Antonio, Helvetia Anaitasuna, La Rioja (Espainia), Pick Szegen (Hungaria), Kolding (Danimarka), Chambéry (Frantzia) eta Wisla Plock (Polonia) aritu da, berriz ere Frantziako Tolosako taldearekin fitxa sinatu aitzinetik. Espainiako selekzioarekin Europako txapelketan zilarrezko domina ere lortu zuen Mindegiak 2016an.
Fenix Toulouse taldeak laugarren postuan akitu du Frantziako liga, kopako finalerdietara ailegatu da eta Europan konpetituko du datorren denboraldian.