Malerreka Bizirik taldeak aurkeztu dituen makroproiektuaren kontrako iritziak gai hauen ingurukoak direla azaldu du taldeak:
- Poligono eolikoa arreta bereziko paisaian kokatuko litzateke eta aerosorgailuen kokapena gaitu gabeko eremuetan aurreikusia da.
- Aerosorgailuak monumentu megalitikoen ondoan ezarriko lirateke.
- Red Natura 2000k aipatzen duen lur eremuan eragin zuzena izanen luke: erreken arroak, paisaiarekiko inpaktu ikaragarriak eta bertan bizi diren espezieen galerak jasanezinak izanen lirateke (pausalekuak, elikadura, migrazioa…). Landaretza eta zuhaitzen erauzketa masiboa ere eraginen luke.
- Zaratak eta kutsadura elektromagnetikoak giza osasunean kalteak areagotuko lituzke.
- Jarduera sozio-ekonomikoekiko eraginak turismo jasangarrian ('bailara lasaien' txikizioa), nekazaritzan, abeltzaintzan eta baso ustiapenean, baita ehiza eremuan ere.
- Atzeraezinezko kalteak lur mugimenduak egiterakoan: lur azpiko akuiferoen hondamena, luizien arriskuak…
- Aerosorgailuetako eta ebakuazio elektrikoko lineako sute arriskuak. Sutea larriagotu eginen litzateke basoetan eta landaretza handia dagoen eremuan egoteagatik, baserri, borda eta herriguneetatik hurbil.
Malerreka Bizirik-en ustez, «Zelena Renovablek sustatzen duen proiektuak ingurunean eragin larriak eta atzera bueltaezinak sortuko lituzke gure eskualdean» eta horregatik Nafarroako Gobernuari «aurreikusitako proiektuaren tramitazioari bukaera eman diezaiola» exijitu dio.