Iturengo abenduko kultur egunak egitarau zabalarekin datoz

Ttipi-Ttapa 2023ko abe. 2a, 11:00
Arturo Kanpion abesbatzak kontzertua emanen du igandean Iturenen eta herriko musikariak ere kantuan ibiliko dira.

Hilaren 3an kantu herrikoiak eta Arturo Kanpion abesbatza izanen dira, 8an partxis eta bingoa Aurtitzen eta mus txapelketa Iturenen eta 9an Zuhaitz Gurrutxagaren bakarrizketa

Aspaldiko urteetan abenduko zubian kultur egunak ospatzen zituzten Iturenen. Aurten ere kultur egunak antolatzea erabaki du Iturengo udalak. Hasteko, abenduaren 3an, Nafarroaren eta Euskararen egunean, eguerdian kantu poteo musikatua izanen da. Herriko musikariekin kantuan aritzeaz gain, Arturo Kanpion abesbatzak ere kontzertua eskainiko du, Nafarroako Gobernuak antolatua. 


Abenduaren 8an eta 9an
ere izanen da zer egin. Ortzirale arratsaldean Aurtizko frontoian partxis eta bingoa izanen dute gaztetxoek eta gauean Iturengo ostatuan mus txapelketa. Biharamunean, Iturengo herriko etxeko ganbaran, 19:00etan Zuhaitz Gurrutxagaren Futbolistok bakarrizketa ikusteko aukera izanen da. Sarrerak 5 eurotan daude salgai, 637 14 58 01 (Miren) edo 646 21 45 73 (Maria) zenbakietan. Azkar ibili, martxa ederrean saltzen ari dira-eta! Akitzean udalak bokatak paratuko ditu saltzeko. Lortzen den dirua kultur ekitaldiak antolatzeko bideratuko da. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun