Azpeitiko erremonte txapelketaren finala jokatu zuten urriaren 27an, ortziralean Izarraitz pilotalekuan. Josetxo Ezkurra II.a doneztebarrak eta Uitziko Martirenak bi jokoak irabazi zizkieten Lekunberriko Aldaberi eta Saldiasko Aritz Juaneneari (15-11 eta 15-4).
Final berdindua espero zen eta halaxe gertatu zen lehen jokoko hamarnako berdinketara bitarte. Hortik aitzinera, ordea, bikote bakarra izan zen kantxan, gorria, eta merezimendu osoz jantzi zuten txapela. Lehen jokoan Ezkurra II.a izan zen onena. Hamarnako berdinketaren ondotik, 5-1eko partziala egin zuten gorriek, jokoa bereganatzeko (15-11). Bigarren jokoan Martirena izan zen protagonista. Erabat agintzeaz gain, lau tanto egin zituen sakearekin eta bortz piloteoan. Bigarren jokoa 15-4 irabazi zuten gorriek.
ç
Finalaren aitzinetik, jaialdiko lehen partidan, Ansa II.ak eta Barrenetxeak 2-1 irabazi zieten Urriza eta Larrañagari (15-11, 7-15 eta 5-2).