Nafarroako XVIII. erremonte txapelketako finalerdietako itzulerako partidak asteburu honetan jokatuko dituzte eta, beraz, urriaren 28an Zubirin jokatuko den finaleko protagonistak zein izanen diren erabakiko da. Urriaren 21ean, larunbatean Irunberrin ariko dira Eloy Otxandorena doneztebarra eta Ion, Zeberio II.a eta Aimar Saldias oiztarraren kontra eta urriaren 22an, igandean, Altsasun, Xanti Uterga doneztebarra eta Agirrezabala, Matxin III.a eta Otanoren kontra.
Finalerdietako joaneko partidetan, Zeberio II.a eta Saldiasek tanto bakarragatik irabazi zieten Eloy Otxandorena eta Ionen ordez aritu zen Barricarti. Utergak eta Agirrezabalaren ordez aritu zen Mitxeok, berriz, sei tantoko aldearekin irabazi zieten Matxin III.ari eta Otanori.
Erremonte Fundazioak antolatu duen txapelketa honetako jaialdi guztietan bezala, sarrerak ADANO elkartera bideratuko dira asteburuko bi jaialdietan ere. 16 eta 22 urte arteko ikusleek bortz euro ordaindu beharko dute eta gainerakoek hamar euro. Hamasei urtetik beheitikoek ez dute ordaindu beharrik izanen. Erremontisten kamisetak ere zozketatuko ditu Erremonte Fundazioak.