Ohiko egitarau zabalarekin Euskararen Eguna antolatu dute Zubietako gazteek asteburu honetarako. Urriaren 6an, ostiralean 18:00etan, Joseba Sarrionaindiak Euskara eta euskal literatura hitzaldia emanen du eskolan. 20:00etan pintxo lehiaketa izanen da Errandonean (pintxoak entregatzeko epea 18:00etatik 18:30era). 22:00etan mus txapelketa jokatuko dute Errandonea ostatuan.
Egun handia larunbatean
Urriaren 7an, larunbatean, 10:00etan hasita, herriko eskulangileen lanak egonen dira ikusgai eta erosgai plazan. Urdaiazpiko eta gazta apustua ere eginen dute. 11:00etan joaldunak ibiliko dira. 12:30ean aizkora apustua: Mikel Indakoetxea eta Mikel Santesteban, Raul Castro eta Antonio Jaunarenaren kontra. 13:30ean bertso saioa balkoitik balkoira: Bittori Elizalde eta Iker Gorosterrazu. 14:30ean herri bazkaria. 16:30ean haurrentzako magia ikuskizuna izanen da, Marsel magoaren eskutik. 17:30ean Turrutxiki txaranga ibiliko da kalean. 20:00etan Korrontzi taldea. Ilunabarrean taloak eskainiko dituzte eta Euskararen Eguna borobiltzeko, gauerdian hasita, Trikidantz taldearekin dantzaldia.