Nafarroako XVIII. erremonte txapelketako partida jokatu zuten ortziralean Doneztebeko Ezkurra pilotalekuan. Herriko bi aurrelari aurrez aurre ziren, Xanti Uterga beteranoa eta Aimar Jabalera gaztea eta 500 ikusle bildu ziren. Utergak eta Agirrezabalak nagusitasunez irabazi zuten, 35-23 eta emaitza horrek Zeberio II.a eta Aimar Saldias oiztarra sartzen ditu finalerdietan. Jabalera eta Barricart txapelketatik kanpo gelditu dira.
Jaialdiko lehenbiziko partidan, Errekako lau erremontista aritu ziren: Belarrak eta Imanolek 30-23 irabazi zieten Mikelarenari eta Maylin II.ari. Ondotik, e•remonteko lau erremontista aritu ziren, horietatik hiru Doneztebekoak. Eloi Otxandorenak eta Dabid Mitxeok 30-25 irabazi zieten Matxin III.ari eta Markel Leatxeri.
Doneztebeko kirolariei omenaldia
Baina ortziraleko jaialdiak, aurten ibilbide oparoa izan duten Doneztebeko bertze kirolariak omentzeko ere aprobetxatu zuten. Honela, berriki erretiroa hartu duen Ibai Meoki eskubaloi jokalaria; Nafarroako 500 eta 800 metroko errekorrak hobetu dituen Saioa San Miguel 17 urteko atleta; judo egokituan Nafarroako txapeldun izan den Andrea Mindegia; laxoa txapelketa irabazi duen Doneztebe The Moment taldea eta kamioi lasterketetan Behe Aragoiko txapelketa irabazi duen Javier Mariezkurrena gidari beteranoa omendu zituen udalak eta zapia eta botila bana ardo eskuratu zituzten.