Aspaldiko ohiturari eutsiz, Iturengo joaldunak Zarauzko Euskal jaian aritu ziren eta beraien joare soinuak zabaldu zituzten besta handi horretan. Aitzinera begira, iraileko hirugarren larunbateko bestan joaldun kuadrilla gogotsu ariko da joareak astintzen.
Egitarau zabala
Ekitaldiz beterik izanen da aurtengoan ere Joaldunen eguna irailaren 23an. Larunbat goizeko lehen ordutik joaldunen joare soinuek eta herriko trikitilariek eta panderojoleek beraien ibilbidea eginen dute baserriz baserri eta herrian barrena. Eguerdi partean herri kirolak izanen dira herriko plazan, Arraioz eta Basaburuaren arteko norgehiagokarekin, proba konbinatuan. Segidan, Unai Agirrek eta Aitor Mendiluzek bazkaria baino lehen bertso batzuk botako dituzte. Karparen azpian herri bazkaria izanen dute. Gero, bertsolariak eta Andoni Mitxelena akordeoilariaren eskutik dantzan eta kantuan aritzeko aukera izanen da.