Euskal Artzainak Ameriketan elkarteak, Elgorriagako Museoaren kanpoko aldean diasporari buruzko panelak paratu ditu.
Bederatzi panel berri jarri dira, Eusko Jaurlaritzako Kanpo Harremanetarako Departamentuak eginak, lehen aldiz iaz Donibane Garazin ospatu zen Diasporaren Egunean jarri zirenak.
Orduz geroztik, Iparraldeko zenbait herritatik pasa ondotik, Nafarroara iritsi dira Euskal Artzainak Ameriketan elkartearen eskutik. Uztailean eta abuztuan, Elgorriagako museoan izanen dira, udako ordutegian: asteartetik larunbatera 11:00etatik 14:00etara. Irailean Urdazubira eramanen dituzte, bertan, irailaren 9an, Artzain festa ospatu behar delako.
Euskal Artzainak Ameriketan elkartea kontent dago, emigrazioari buruzko informazioa erakusten duen erakusketa hau «gure Museoan eskaini ahal izateagatik, ematen duen informazioak Elgorriagan bertan dagoena borobiltzen duelako eta aberasten duelako». Urte eta erdi baino baino gehiago irekita duen Museoan hagitz harrera ona izan du, «bai turisten aldetik, baita artzainekin zerikusia duten pertsonengan ere, eta bertan egiten den bisita gidatua eta eskaintzen diren bideoak eskertzen dituzte», dio Laura Igantzi, Euskal Artzainak Ameriketan Elkarteko presidenteak.
Gainera, bertara etortzen diren artzainen bizipenak grabatzeko aprobetxatzen ari dira, «ardi kanpoa ikustean oroitzapenak burura etortzen zaizkie eta haiek kontatzen dituzte».