Errepertorioaren abiapuntua Mendi Abesbatzak pasa den apirilean Iruñeko Baluarte Antzokian orkestra laguntzaz abesteko prestatu zituen obrak izanen dira: Hilarión Eslava Maisuaren Mi b-eko Meza eta Felipe Gorritiren Miserere hain zuzen ere. Biak ala biak, Nafarroan izan diren konpositore garrantzitsuenetarikoek sortutako obre sendo eta mamitsuak dira. Eslavaren meza osorik interpretatuko dute: Kyrie, Gloria, Credo, Sanctus eta Agnus dei. Gorritiren kasuan, aldiz, hiru zati aukeratu dituzte emanaldirako: Miserere, Rede Mihi eta Tunc imponent.
Kontzertuaren lehenengo zati hau aldaretik abestuko dute, pianoaren laguntzaz. Bigarren zatirako berriz, interpreteak korura igoko dira eta handik eskainiko dituzte Perosi maisu italiarraren 2. Mezako Kyrie eta Gloria, zein Eslavaren Tu es petrus organoak lagunduta. Obra guzi hauek Doneztebeko musika zaleentzat ezagunak dira honezkero, sanpedro besten inguruan aspaldi samarretik abesten baititu abesbatzak.
Emanaldian hainbat bakarlari ariko dira, tartean Loli Salaberri sopranoa, Alicia Telletxea eta Axun Viela mezzo-sopranoak, Gorka Ordax tenorea zein Beñardo San Miguel baritonoa.