Ikasturte amaierarekin batera etorri ohi da Nafarroako gazteen Bertso Eskolen Eguna. Aurtengoak ere badu data dagoeneko: maiatzaren 21ean ospatuko da, Iturenen. Nafarroako Bertso Eskolen sareko 9 eta 16 urte bitarteko ikasleei zuzenduriko jarduera da Bertso Eskolen Eguna.
Igande goizean Iturengo joaldunak ezagutzeko eta haiekin solastatzeko aukera izanen dute gazteek. Ondotik ginkana bat eginen dute herrian eta behin akituta denek elkarrekin bazkalduko dute. Arratsaldean, Gure ahots bideo motz bideo lehiaketaren baitan sortutako bideoak ikusiko dituzte eta sari banaketa eginen da. Azkenik, ikasleen arteko bertso saiorekin borobilduko dute eguna.