Sunbillako etxe-izenak eliz atariko hilarrietan lana argitaratu zuen Koldo Colomo Castro ikerlariak Cuadernos de Etnología y Etnografía de Navarra aldizkariaren 95. zenbakian. Sunbillako eliz atarian hilobi-lauza epigrafiatuak daude. Idazkunen ikerketaren bidez, berrogeita bederatzi etxe-izen bildu eta kronologia orokorra proposatu du egileak.
28 lauza bere osotasunean kontserbatu dira, hiru kasutan epigrafia galdu badute ere. Bere osotasunean mantendu direnak era ordenatuan jarririk daude: burua ekialdean eta oinak mendebaldean. Bertze lauza batzuk, berriz, zatikaturik daude, zolan barreiatuak.