Emantzipatzea lortu duten hamarretik ia zazpi gaztek dirulaguntza bat hartuta edo soldata finkoa edukita emantzipatu dira. Zehazki errateko, % 15 dirulaguntza bati esker; % 35 diru sarrera finkorik gabe eta % 50 soldata finkoarekin.
Ezagun batean etxean
Nola emantzipatu diren ere galdetu diete eta bi herenak aitortu du ezagun bati esker lortu duela etxebizitza eskuratzea. Gainerako % 36ak etxea bere gisa aurkitzea lortu du. Datu gehiago ere eman dituzte: % 36 alokairuan bizi da ezagun baten etxean; bertze horrenbertze alokairua berak bilatutako etxe batean eta % 28k jabetza ezagun baten etxean du.
Emantzipatu nahian
Etorkizunera begira, %55ek hemendik hiruzpalau urtetara emantzipatua egonen dela uste du, eta herrian edo eskualdean emantzipatu nahiko luketen galdetuta, erantzuna argia izan da: hamarretik bederatzik herrian edo eskualdean gelditu nahiko luke bizitzen. Hala ere, gutti dira bertan emantzipatzeko aukerak ikusten dituztenak, % 24 baino ez. Lautik hiruk uste du ez dagoela aukerarik.
Horrez gain, gazteen % 59ren irudiko, eskualdeko herrietan etxe huts aunitz daude eta aunitz dira etxebizitzarekin dagoen arazoaren ondorioz, gazteek eskualdetik alde egiten dutela pentsatzen dutenak. Zehazki, % 88k hala uste du.
Jardunaldia Donamarian
Baztan-Bidasoko Ernai Landa eremuaren etorkizunerako herri alternatiba orain dinamikarekin ari da lanean, eta landa eremuaren etorkizunaren aldeko lehenbiziko jardunaldia martxoaren 18an Donamarian egitekoa dute.