Inauteriak 2023

Inauteriei begira hainbat ohar egin dituzte Iturengo eta Zubietako udalek

Ttipi-Ttapa 2023ko urt. 25a, 16:00
Deskargatu Info Ahotsak :
es en fr

Urtarrilaren 30ean eta 31n inauterietako egun haundiak dituzte Zubietan eta Iturenen, eta horren harira, kontuan hartzeko oharren berri eman dute bi herrietako udalek. Bertzeak bertze, «joaldunen eta mozorroen ibilbidea errespetatzeko» eskatu dute, baita «animaliei tratu txarra ematea debekatua» dagoela eta «karrozetan erabilitako auto eta traktoreek asegurua» izan behar dutela oroitarazi ere. Horrez gain, Zubietako kasuan, 13:00etatik aurrera herriko sarrera ibilgailuendako itxiko dute.

Inauteriak ongi pasatzeko mezua zabaldu diete bi herrietako udalek herritarrei. Baina horrekin batera, zazpi puntuko bandoa zabaldu dute heldu den astelehenean eta asteartean, urtarrilaren 30ean eta 31n, ospatuko dituzten inauteriei begira:

  1. Debekatua dago plazan aparkatzea.
  2. Zubietan, herriko sarrera 13:00etatik aurrera itxiko dute ibilgailuendako.
  3. «Ezinbestekoa da» joaldunen eta mozorroen ibilbidea errespetatzea. Joaldunak plazan sartu arte karrozak plazan ez sartzea eskatu dute.
  4. Karrozetan erabilitako autoek eta traktoreek asegurua izan eta indarrean dagoen araudia bete behar dute.
  5. Desfilea akitu ondotik, karrozak plazan ez uzteko eskatu dute. «Bakoitza bere tokira erretiratu».
  6. «Debekaturik dago animaliei tratu txarra ematea edo justifikatu gabeko kalte edo sufrimenduak ekartzen dizkien edozein gauza egitea».
  7. «Zentzuz jokatu argazkiekin sare sozialetan».

 

Bestak Malerreka Ituren Zubieta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun