Itziar Gomez kontseilariak zerbitzu hau Malerrekan ere eskaintzearen garrantzia azpimarratu du, izan ere, «eskualde honi puntu garbi bat ematea funtsezkoa zen herritarrei gaikako bilketaren ohiko kanaletan utzi ezin diren hondakinak behar bezala kudeatzen laguntzeko».
Bertzalde, Malerrekako Mankomunitateko lehendakari Jon Telletxeak aipatu du garbigune berriak eragin positiboa izanen duela ingurumenean, «hobe birziklatzen eta ezarritako helburuak betetzen lagunduko baitigu. Egun garrantzitsua da Malerrekarentzat eta gainerako herrientzat, ezinbestekoa baita hondakinak ongi tratatzeko eta ingurumena errespetatzeko».
Azpiegitura hori egiteko inbertsioa 638.045 eurokoa izan da. Lurralde Kohesioko Departamentuak kudeatzen duen 2017-2019ko Toki Inbertsioen Planak 344.512 euro jarri ditu, eta Landa Garapeneko eta Ingurumeneko Departamentuak kudeatzen duen Urte anitzeko Etxeko Fluxuaren 2021-2023 Hondakinen Funtsak 250.000 euro eman ditu. Bertzade, Nafarroako Hondakinen Kontsortzioak osatuko du finantzaketa, Malerrekako Mankomunitatearekin inbertsio horretarako ekarpen bat hitzartua baitu, aurten 77.000 euroko gehieneko mugarekin.
Astelehenetan, ortzegunetan eta hilabeteko bigarren eta laugarren larunbatetan zabalik
Garbigunea astelehenetan 09:30etik 13:30era eta 15:30etik 18:00etara, ortzegunetan 15:30etik 19:00etara eta hilabeteko bigarren eta laugarren larunbatetan 09:00etatik 14:00etara egonen da zabalik.
Orain arte, Malerrekako Mankomunitateak garbigune mugikor bat eta bi etxola zituen, eta instalazio berriak hondakinen kudeaketa egokiarekin lotutako zerbitzu-beharrak osatuko dizkie eskualdean bizi diren 5.700 pertsonari baino gehiagori.