Andoni Ugalde oiartzuarra izanen da Doneztebeko Erreka elkarteak lehen aldiz antolatutako Bortz Kirol txapelketako lehen finalista. Larunbatean David Albiasuren kontrako finalerdi estuan jokoan ari zela narbartearrak lehia utzi behar izan zuen laugarren partidan. Datorren larunbatean Donibaneko Jerome Karrikaburuk eta Doneztebeko Eloi garciak jokatuko duten bertze finalerdian erabakiko da bigarren finalista.
Larunbateko finalerdia izaten ari zen txapelketa honetako norgehiagoka estuenetako bat. Xaren Ugaldek 20-18 irabazi zion Albiasuri; joko garbin narbartearrak 20-13 irabazi zion oiartzuarrari; eskularruarekin Ugaldek 20-10 irabazi zion Albiasuri eta paletaz, narbartearra 11-4 irabazten ari zela, ondoezik sumatu eta erretiratu egin zen. Hortaz, Ugalde finalean izanen da.