Nafarroaren Eguneko kontzertua eskainiko du Mendi Abesbatzak larunbatean Donezteben

Mendi Abesbatza aurtengo udazkenean Burlatan egindako kontzertuan.

Nafarroaren Eguneko kontzertua berezia eskainiko du Mendi Abesbatzak larunbatean Doneztebeko elizan. Emanaldia 12:00etan izanen da, eta Nafarroako Ereserkiarekin hasi eta gisa aunitzetako kantak interpretatuko dituzte. 

Larunbatekoa ez da abenduan abesbatzak eskainiko duen kontzertu bakarra izanen. Doneztebeko herriarentzat dagoeneko ohitura bilakatu den Eguberrietako kontzertu berezia eginen dute abenduaren 16an, 20:00etan elizan. Aurtengoan gainera, ez dira bakarrik izanen Mendi Ttiki abesbatzak ere beraiekin kantatuko baitu azken urteetan bere jarduna etenda egon ondotik. 

Horrez gain, Donostiako Udalaren Txistulari Taldeak ere hartuko du parte, Jose Ignazio Ansorenak gidatuta. Aurtengo kontzertuaren ildo nagusia Pablo Sorozabal izanen da, bere jaiotzaren 125. urteurrena ospatzen baita. Bere musika gogoratu eta berreskuratuko dute saioan, pasa den Ekainean Donostiako Victoria Eugenia Antzoki ederrean talde hauek berberek eskaini zuten kontzertuaren oroigarri.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun