Uda giroa

Doneztebeko besta ttikiak ospatuko dituzte asteburuan

Bi urteko etenaren ondotik, aurten bai, aurten  ospatuko dituzte Doneztebeko besta ttikiak asteburuan. Besta giroak hartuko du herria, eta horretarako egitarau zabala prestatu dute udalak eta Gazte Burrunbak elkarlanean. 

Ortziralean hasiko dira bestak 17:30ean Santa Luzia plazan eginen duten haurren dantza emanaldiarekin. Ondotik, frontoian erremonte txapelketako finalak jokatuko dituzte. Ordu berean, erraldoiak eta gaiteroak ibiliko dira karrizka karrika eta 19:00etatik aitzinera Saldiasko taloak dastatzeko aukera izanen da. 20:00etan lehertuko da besta Santa Luzia plazatik botako duten txupinazoarekin. Gauen musika izanen da protagonista. 23:00etan hasita bi kontzertu izanen dira: Lehen lerroa eta Kontralde. Eguna bukatzeko, 01:00etatik aitzinera DJ Endarak alaituko ditu bazterrak.

Azoka eta bazkaria larunbatean

Larunbatean izanen du segida egitarauak. 10:00etan hasi eta 13:30ak arte Uraren bailara azoka eta umeentzako jokoak izanen dituzte Intzakardin. Ondotik, 11:00etan buruhaundiak ibiliko dira herrian barna. 11:30ean mus txapelketa hasiko da plazan eta parte hartzeko bikote bakoitzak 10 euro paratu beharko ditu.

14:00etan zikiro jatea izanen dute, eta ondotik karrotxaranga ibiliko da ostatuz ostatu. 15:00etan, Aparan industrialdean 4x4 triala eginen dute, Booma 4x4 taldeak antolatuta.  18:00etan haurrentzako Historiko nago antzerkia izanen dute plazan. Ondotik, musika izanen dute: 20:00etan Los Andus taldea ariko da, eta gauerditik hasita 04:00ak arte Gabezin erromeri taldeak alaituko du besta.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun