Xuban Kañamaresek irabazi du Nafarroako bigarren mailako aizkora txapelketa

Ttipi-Ttapa 2022ko ira. 19a, 12:00
Xuban Kañamares txapeldun, Patxi Mindegia bigarren eta Jesus Etxeberria hirugarren, Nafarroako bigarren mailako aizkora txapelketako podiumean, Herri Kirol Federazioko ordezkariekin. Argazkia: Xagu-Lesaka

Bigarren izan zen Patxi Mindegia zubietarra igandean Uharteko finalean, eta biak igoko dira lehen mailara

Nafarroako gizonezkoen bigarren mailako aizkora txapelketaren finala jokatu zuten igande arratsaldean Uharteko Ugarrandia kiroldegiko frontoian. Arantzako kanporaketan Xuban Kañamares izan zen bizkorrena eta 23 minutu eta 58 segundo behar izan zituen bi kanaerdiko, bi 60 ontzako eta oinbiko enborra mozteko. Bigarren postua Zubietako Patxi Mindegiak eskuratu zuen, minutu eskasera (24.55) eta biak ariko dira lehen mailan datorren urtean.

Podiumeko hirugarren koxka eskualdeko bertze aizkolari batentzat izan zen, Beintza-Labaiengo Jesus Etxeberriarentzat (28.18). Goizeder Belza laugarren izan zen (29.31) eta Zubietako Mikel Indakotxea bosgarren (30.50).

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun