ITZIAR AGIRRE

«Gazteak ez bagara gure interesen alde mugitzen ez du inork eginen»

«Betikoa den aisialditik kanpo gazteria mugiarazi» nahi dutela dio Itziar Agirrek.

Itziar AGIRRE SAGASETA, Donamariakoa.

«Lagun batek» eman zion Itziar Agirre Sagasetari (Donamaria, 2001) asanbladaren berri, eta proposamena «interesgarria» iruditu zitzaion «hainbat gairi buruz solastatzeko». Hala sartu zen Lapaitza Gazte Asanbladan. Kontatu duenez, hainbat dira kezka sortzen dioten gaiak: «asanbladak goratu zuen infografian agertzen direnak gehienbat: feminismoa, euskara, anti-arrazakeria, LGTBIQ+...» eta «horien  inguruan Malerrekan dauden aurreiritziak eta iritziak orokorrean kezkagarriak» direla dio donamariarrak.

Sinetsita dago gazte asanbladak kezka partekatu horiek dituen «jendea elkartzeko eta elkar ezagutzeko» balioko duela, eta bidenabar, «gure artean harremana sortzeko» bitarteko egokia ikusten du. Horrekin batera, egiten dituzten ekintzen bitartez, «bertze jende mota bati bertzelako egoerak» ikusarazi nahi dizkiotela azaldu du, «betikoa den aisialditik mkanpo gazteria mugiaraziz». Agirrek garbi du «gazteria ez bagara gure interesengatik borrokatzeko mugitzen, ez duela inork eginen». Horregatik egin du «egiten ditugun ekintzetara animatzeko» deia: «Giro polita sortzen ahal da Malerreka-Bertizaranako bazter hauetan». Gehiago ere adierazi du: «Ez gara inork baino gehiago dakien gazte kuadrilla. Beraz, ez lotsatu eta hurbildu, ez dugu ausikirik egiten eta hagitz jatorrak gara».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun